ايام وعدت /بقلم علي ياقوت

ايام وعدت

واهو عدا عام
تكمل بيه سنوات

ايام حلوة
وايام أهات

وبسمة تحاوطنا
ودمعة ودمعات

بناس عننا تبعد
وناس تقربها المسافات

ب اشجان على الربابة تحكى
وترقصلها النايات

وحروف منسية بينا
محوزفة من الكلمات

نحملها جوانا ب الحشى
وننساها ساعات

وكلنا على دا الحال
اوقات و اوقات

بتاخدنا خطاوينا مشاوير
ريحات وجيات

ومشاعرنا مخلوطة
ما بين خد وهات

تايهة مابين زمن عدا
وزمن فات

وحبيب مستنى حبه
وحبيب حبه مات

وقلوب على السكة بتحكى
وبتنسج مع نفسها
من جديد دقات

واطفال بتجرى مع العابها
عطشانة امنيات

واحلام طايرة فى الهواء
محبوسة وسط
السكات

و رحلة بتنهى بينا
على كل المحطات

ب ايدين مرفوعة
تحكى وتقول سلامات

والليالى طويلة صيف وشتا
وعناوين وحكايات

حكاية لها الف حكاية
وحكاية منسية الذات

وكلنا فى النهاية حكاية
مطوية الصفحات

ورايحين وسيبنها لغيرنا
يقراها حزن وشجن مرة
ومرة اغنيات

مع ناس تبكينا مرة
وتضحك علينا
مرات

علي ياقوت
مصر