انا والدنيا ///////بقلم. ربيع. النمري

.....أنا والدنيا ......
يدي على خدي
والدمع داير سواقي
الهم مع الدم
يجري فعروقي
ؤ زفرات عوافي
خارجة من اعماقي
طول عمري عايش
فدنيا شبعانة رتاقي
والزمان ايقطع
وأنا ارقع ولاقي
وجهي كتاب أمكمش
عنوانو حالة الشاقي
والجوهر السعد
خاطي طريقي
ؤ طرف د الخبز
تالف بين الزناقي
لحتيني فبحر الهم
ؤ مزال فيا اتغرقي
انت يا الدنيا
ما اتحني ما تعتقي
اسرقتي عمري ؤ صحتي
ؤ مزال طامعة اتسرقي
ايلا انت لايقة أل گاع الناس
في حياتي لاش تليقي
انت عبدة خديمة
ؤ معشوقة الي اداو حقوقي
ليهم اتغني واتشطحي
وانا دايراني قرد الحلاقي
انا نتمحن ؤ نتعدب
وانت زمري ؤ سفقي
حكمك قاسي
ما عمرو كان منطقي
ما راعيتي صغري ولا كبري
عدبتيني فنعاسي و ففياقي
الدل ما دلينيش
وخى اتقيلي فيه تسقي
ويلا كنتي قاصداني
سمحي لي ماعرفتينش اتنقي
انعيش بدرهم حلال
ونربي جيل تقي
والرجى فالله تعالى
ومزال نترجى فيه وباقي .
ربيع النمراي