برد الليالي /بقلم عز الدين ناس الرمى

رائعة من روائع لمجدوب عزالدين ناس الرمى أتمنى أن لا تفوتكم قرائتها😢😢😢😢😢

برد الليالي.....

زفزف و طل برد الليالي خاوي
شكى و بكى ما لقاش و نيسو
لا غلة لا ربيع خضر كل شي ع لاوي
حتا النحلة ما تقدرش تقيسو
لا غيوم لا مطر للجراح تداوي
لفدان صفار لوا و ذبل غرسو   
ياك تغير الحال ما بقاش مساوي
حراش ديك الأرض توحش غيسو
لا كريمبوش لا بلعمان لا سبول مداوي
لا فزاعات على الجوش يحرسو
زعف الطير هجر واش زعما ناوي
في بلاد الغربة يصيب و نيسو
يفرح و يغني يغرد و يساوي
يهجر لحزان و يسمعنا  حسو
ما نفع سبوب لا بخور لا جاوي
مشى زمان الخير ما بقيت نلمسو
فين ديك لبغلة تمشي بجوج ركاوي
تهرول فداك لمسرب و الربيع تلحسو
فين جدي و جدك فالجماعة داوي
ياك توسدو التراب و فالروضة نعسو 
كان بويا لحنين للحج يمشي ناوي
جات الموت داتو من لخيمة تقطع حسو   
فين خبز ينور فين دوك لملاوي
ملي ماتت حنا ما بقينا نتجمعو  نجلسو
قساحت لينا لقلوب دخلاتنا التناوي
الجلد لصق عل لعظم ما بقينا نحسو
 ولا الولد الصغير في  كبيرنا داوي
 لبهايم و لبكمات في التراب يلحسو
النية هربت و مشات كلشي ولا يعوي
كيف الكلب المجراب ما تقدرش تمسو
لكثير  ولا مسخوط يلكط فالدعاوي
شلا خصايل زينة علينا غبرو نقصو
لعبد ما زال صغير ولا يبان لك لاوي
يسوط و يتنهد يبكي مزير نفسو
تبدلات الحياة ما بقات حاجة تساوي
طارت البركة شلا حوايج خصو
رحمنا يا الكريم ضمد جرحنا داوي
سقي عبادك بلماطار راهم تخصو.........

بقلمي : عزالدين ناس الرمى

Le 30/12/2019