صياد النعام /بقلم عز الدين ناس الرومي

صياد النعام............

شهدي يا حروفي شهدي عليا
شوفي شوفي آش راني نكتب
العين تبكي بدموع الكبدة مكوية
القلب يشكي مسكين و معذب
شوفي حبابي آش دارو فيا
خلاو شحال من دقة فلقلب
هوما و الزمان تلوواو عليا
عييت نراجع يا ناس و نحسب
ما درت والو و كواوني ألف كية
خلاوني غير وحدي نجدب
الصباح عندي يدوز كيف لعشية
شمس لحزان عليا تشرق و تغرب
في نعاسي نتمناهم يبانو ليا
عليهم نبات نبحث و نقلب
هوما مشاو وآنا نخلص لخطية
آش داني نمشي لبلاد الحب
تعذبت آنا بزاف ماشي شوية
شلا جروح بقات مرسومة فلقلب
نستاهل  آنا لي درت النية
بالسيف اليوم يا حبابي نتغلب
ياك لي دار الغلطة يخلص الدية
 و يعيش وسط حبابو مغرب
نوصيكم لا تيقو في لحدية
لا تغركم يا ناس ضحكت الثعلب
نوصيك يا صياد باش تصيد لقنية
خاصك تكون حرايفي و مدرب
عندك القرطاس موجود و لخماسية
و قوام الصيدة يا سيدي و لكلب
لا بغيتي تصيد ترزن و تقل شوية
نوصيك يا صاحبي نييش لا تزرب ..........

بقلمي : عزالدين ناس الرمى

Le 28/11/2019

تعليقات

المشاركات الشائعة من هذه المدونة

رجاء 2019//بقلم فؤاد الفائشي

قصص خياليه /بقلم عادل بن مبارك باعطيه

سأسكت /بقلم محمد احمد