الستر جاني /بقلم فاروق الباشا

الستر جانى

التمر تمر حنة
والريحة جاية من الجنة
والمية عصير ورد
متحلية بعسل شهد
والغوايش جوز وفرد
والمشاءالله هدية ماتترد
والقمر بدر فى تمامه
والكل عندنا ندامه
قلت ياسعدى وياهنايا
جالى مرادى ومناية
قلت له خد ايدى
داانت فى الدنيا سيدى
وسيدى يعنى وديدى
وعايش جوه فى وريدى
ووصولك يوم عيدى
قاللى يللا نتهنى
بعنيكى اوريكى الجنة
وادوقك حلاوة النعمة
مشانى على بساط احمر
من فرحتى رحت اتمخطر
ماانا فرحتى ماتتقدر
وجابلى لى ورد الوان
بايده قاطفه من بستان
وعباية وارد عمان
وجابلى عقد لولى
اشاور له يناولهولى
وجابلى كمان فستان
مزهزه وكله ستان
ده كله رهن بنان
قلتله والله فيك ماافرط
ولا عليك يوم اتشرط
داانا من غيرك اتغرب
ودمى يتصفى ويهرب
وجابلى سلسلة فضة
تحفظنى من الخضة
وجابلى مصحف قرأنى
لاجل يزود ايمانى
وجابلى معاه مصلية
اقف عليها متوضية
اصلى وادعيله والنية
يارب يخليه ليه
ونعيش سوى سنة ومية
      مع تحيات فاروق الباشا