فزع كورونا /بقلم علي عبد الرحيم

فزع كورونا
-------------
يا للي بتقراو الكف
يا للي بتشوفوا الودع
ليه الامان ف الدنيا جف
وانتشر المرض والوباء والفزع
صحيح فينا بشر
فيرس الغدر والخداع ف وريدهم انتشر
والحقد والضياع على ضميرهم انتصر
ولسانهم بالوقاحه والسفاله صريح
بس يصعب عليك المريض والجريح
حتى لو عمل البدع
ياللي بتقراو الكف
ياللي بابتشوفوا الودع
وباء كورونا قال ايه يا عم حسونه
جاي يزرع ما بينا البعد
بقينا بنخاف نقرب من بعض
بقينا بنخاف نسلم على بعض
ياعم حسونه بلاش نكذب على بعض
احنا من ايام الخصخصه والفساد والمعونه
وقلوبنا بعيد قوى قوى عن بعض
والطيب فينا مكسور اه وبيتوجع
ياللي بتشوفوا الودع
قولوا للخسيس والجدع
علاج فيرس كرونا بيعوا الدنيا المجنونه
واشتروا الاخره والاولى
بطهارة النيه والقلب
ورضا وعبادة الرب
وازرعوا ف ايامكم اشجار الحب
واهجروا بيوت الخداع والكدب
وقرأن ربنا يتقرا ويتسمع
ياللي بتقراو الكف
ياللي بتشوفوا الودع
ليه الامان ف الدنيا جف
وانتشر المرض والوباء والفزع
على عبدالرحيم محمد